KALIBO, Aklan—Uman nga nagpadumdum ro Aklan Police Provincial Office ukon APPO sa mga senior citizens kamana man sa andang natungdan nga pamilya nga ibhan ro mga katigueangan kon may ginapanawan eabi eon kon may daea nga mabahoe nga kantidad it kwarta.
Raya hay kasunod it napabalita nga uman nga pag-atake it gina-alegar nga budol-budol gang nga nagbiktima sa sangka senior citizen ag nabo-oe kana ro bitbit nga kwarta nga kapin sa P50,000 .
Suno kay P/Capt. Aubrey Ayon, tagapaghambae it APPO nga kinahangean nga maging alerto ag indi basta-basta nga magkumpiyansa sa mga tawo nga bukon it kakilaea.
Kaeabanan sigon nga nagakalhit kada holiday season ro mga lawless elements ukon maeain nga elemento bangud nga nasayuran nanda nga maabu nga kwarta ro mga tawo bangud sa mga Christmas bonus ag padaea nga kwarta it mga palangga sa kabuhi .
Kadungan kara, gin engganyo nana ro publiko nga kon may mga impormasyon angot sa mga insidente it budol budol ag iba pang krimen, insigidang makipag-angot sa pinakamaeapit nga police station agud nga mai-report ag dayun nga mataw-an it nagakaigo nga aksyon .
Samtang, mabahoe nga bulig suno kana ro mga naka-install nga CCTV camera sa madasig nga pagtumod it mga suspek.
