KALIBO, Aklan—Haeos sold out eon ro mga tickets para sa opening ceremony it gina-abangan nga Paris Olympics nga maga-arangkada hin-aga nga adlaw, Hulyo 26.
Raya ro ginpahayag ni Bombo International Correspondent Mary Den Araneta, tumandok it Batan, Aklan ag presenteng nagatrabaho sa Paris, France.
Suno kana haeos minilyon eon ro mga Olympics tickets ro nabaligya, apang may nabilin pa nga medyu mahae ro anang presyo.
Samtang, ideal suno kana ro weather condition makaron sa Paris para sa pormal nga pagbukas it summer Olympic games.
Haeos visible eon man suno kana ro paglinibot it kapin sa 10,500 nga mga atleta halin sa 206 nga nasyon nga magasabak sa pahampang kun sa siin may 329 nga events ag 32 nga sports.
Partikular nga makita ro mga atleta ag iba pang mga bisita sa iconic landmark it Paris nga Eiffel tower nga ginkabitan it sambilog pang iconic nga limang Olympic rings.
May pilang Pinoy athletes eagi sigon ro magasabak sa kompetisyon pagkatapos it opening ceremony kapareho ni Carlos Yulo .
Ro mga mapas-eawan nga makasueod sa venue hay sarang makita ro mga nagakatabu sa ginpahaum nga big screen it gobyerno it France sa mga parke ag iba pang matawong lugar.
Sa pihak nga parte, ginpahayag ni Araneta nga grabe ro suporta nga ginapakita it Filipino community sa Paris sa mga Pinoy athletes.
Sa pihak nga parte, batyag eon makaron ro mas pang ginhugtan nga seguridad sa bilog nga Paris.
Pilang distansiya eamang suno kana hay may presensiya eon man it mga pulis sa mga barikada ag mga checkpoints nga gintukod.
