KALIBO, Aklan — Ginkumpirma ni New Washington Mayor Jessica Panambo nga uman raya nga magapadaeagan bilang alkalde sa 2025 midterm elections sa idaeum it local party nga “Tibyog-Akean”.
Magapadaeagan si Mayor Panambo para sa reelection sa anang ikaywang termino.
Kompleto eon suno kana ro anang line-up kun sa siin uman nana nga maka-tandem si Vice Mayor Jesus “Molot” Quimpo .
Kaibahan nanda nga magasakar ro mga kaalyado nga incumbent sangguniang bayan members nga sanday Vicente “Esboy” Quimpo, Diosilio “Jojo” Malonosan, Pitche Joy Alfaro, Jazel Bautista, Estrella “Neneng” Velarde ag Allan Bernardino.
Magahana man nga makaangkon it unang termino sa pagka-konsehal sanday dating kagawad it Brgy. Poblacion nga si Jun Crisostomo ag presenteng kagawad it Brgy. Tambak nga si Jabstan Retamar.
Sa Oktubre 7 hay dueueungan sigon sanda nga magadihon it andang certificates of candidacy (COC).
Sa pihak nga parte, aminado man si Mayor Panambo nga owa eon kunta imaw naila nga magpa-reelect agud nga matutukan ro andang negosyo sa Metro Manila , apang bangud sa hinyu it mga pumueuyu hay uman imaw nga magapadaeagan.
Kaibahan sa anang plano engkaso nga uman nga swertehon nga padayunon ro anang mga naumpisahan nga programa ag proyekto partikular ro rehabilitasyon it national port sa Brgy. Dumaguit .
Plano sigon it lokal nga gobyerno it Aklan nga bawasan ro mga nagabiyahe nga roro vessel sa Caticlan jetty port ag isaylo ro iba sa Dumaguit port.
Sa makaron hay nagapadayun ro pag-ayos sa haeos 50 anyos eon nga passenger terminal it nasambit nga pantalan.
Sa pihak nga parte, ginpahayag ni Mayor Panambo nga gin-obra eamang nana ro anang obligasyon bilang ina it banwa matapos nga insigidang gin aksyunan ro reklamo it pilang residente it Brgy. Cawayan nga apektado it stagnant water bangud sa ginsamad nga imburnal.
