KALIBO, Aklan — Nadugangan pa ro numero it namatay bangud sa dengue makaron nga dag-on sa probinsiya it Aklan.
Sa record it Aklan Provincial Health Office, mag-eowas sa namatay nga sangka senior citizen nga residente it banwa it Batan ko Pebrero, nailista ro ikaywang kaso ko nagtaliwan nga adlaw .
Samtang, padayun nga nadudugangan ro kaso it dengue sa probinsiya nga nag-abot eon sa 1,686 umpisa ko Enero hasta Agosto 17 it makaron nga dag-on.
Pinakamataas gihapon sa may nailistang kaso ro banwa it Malay nga may una nga 307 nga ginsundan it banwa it Kalibo nga may 262.
Mataas man ro nailistang kaso sa banwa it Nabas nga may 129 ag Ibajay nga may 106 kamana man sa banwa it Numancia nga kapin sa 111.
Ro mga nabilin nga banwa hay nakalista it double digit kapareho it New Washington nga may 97, Buruanga nga may 96 ag Tangalan nga may una nga 86.
Ro may pinakasangkiri nga nailistang kaso hay ro Altavas nga may 24.
Ko nagtaliwan nga 2023 sa kaparehong period, nag-abot sa 731 ro kaso it dengue kumpara makaron nga dag-on nga may 1,686 ukon pagtaas it 131%.
Sa pihak nga parte, ginpahayag ni Roger Debuque, coordinator para sa dengue program it Aklan Provincial Health Office nga may posibilidad nga magdeklara man it dengue outbreak ro Aklan engkaso nga magpadayun ro pagtinaas it kaso kapareho sa natabu sa mga kaiping nga probinsiya it Iloilo ag Capiz.
Madumduman nga auna eon nga nagdeklara it state of calamity ro daywang nasambit nga probinsiya bangud sa outbreak.
