KALIBO, Aklan—Owa it ginbag-o sa mga sueundanan para sa pagpa-uli it mga Locally Stranded Individuals(LSIs).
Suno kay Kimskie Teodosio it Municipal Disaster Risk Reduction and Management Office ukon MDRRMO-Kalibo nga agud nga masiguro nga ro mga nagabalik nga residente sa andang mga natungdan nga baeay hay bukon it carrier it COVID-19, gina-usuyan ro mga raya it medical certificate halin sa lugar nga andang ginhalinan, travel authority nga gin-isyu it Philippine National Police ukon PNP ag ro acceptance it LGU , kun sa siin, raya ro magasueang kanda gamit ro ambulansiya.
Igapaidaeum sigon ro mga raya sa profiling ag orientation it municipal health officer sa pagsueod sa ligtas covid center ukon strict home quarantine.
Sa masunod nga mga inadlaw hay ginaeauman eon nanda ro pagbuhos it mga LSIs ag Returning Overseas Filipino Workers butang nga ginapahauman nanda raya.
Gindugang pa ni Teodosio nga nag-instrikto eon makaron ro pamunuan it Caticlan Jetty Port agud nga malikawan ro pagpaeagiw ukon pagpanaw nga owa it abiso it mga LSIs maskin nga owa pa ro andang sueang halin sa LGUs nga natungdan.
