KALIBO, Aklan — Matapos nga matipon ro tanan nga mga suhestiyon it mga miyembro it Kalibo Public Market Stall-Owners and Vendors United Association, ginpahayag ni Sangguniang Bayan member Ronald Marte nga pagabag-uhon ro desinyo it mga stalls nga andang ginareklamo .
Suno kana nga kasunod it ginpatigayon nga ocular inspection ko nagtaliwan nga domingo hay ginpaabot nana ro mga concern sa contractor.
Halin sa dating 2.3 square meters nga pwesto nga nakabutang sa andang kontrata hay gin-eaparan raya sa 2.5 square meters .
Makaangkon man it adjustment sa pwesto nga gina-occupy it meat, fish ag vegetable sections base sa hinyu it mga negosyante .
Maskin ro hagdan pasaka sa 2nd floor nga ginareklamo nga masyadong mataas ag makitid ro steps hay pagabag-uhon man .
Sa ikaywang panaegan makita ro mga baealigyaan it bugas, tinuea, sari-sari store ag iba pang dried goods.
Igasaylo man ro food court sa third floor. Dugang pa ni Marte nga aprubado ni Kalibo Mayor Juris Sucro, Municipal Economic Enterprise Development Office (MEEDO) ag Municipal Engineering Office ro adjustment nga pagahimuon.
Samtang, bangud sa mga adjustment nga paga-obrahon, ginpahayag it opisyal nga mapa-isoe ro anang date of completion sa buean it Mayo it makaron nga dag-on imbes nga makaron kunta nga buean it Pebrero.
