Nagpadumdom ro Department of Health (DOH) sa mga pet owners nga likawan ro pagharo sa andang mga alagang hayop kaparehas it ayam bangud sa peligro nga pwedeng mabuoe sa eaway kara maskin sanda hay bakunado.
Ginpahayag ni Health Assistant Secretary ag spokesperson Albert Domingo, nga maeain ro eaway nga makasaylo sa tawo kaparehas it mga kaeos ag angkit bangud nga nagadaea man raya it makamaeatay nga rabies.
Mag-eowas pa sa rabies, delikado man ro daea nga mikrobyo it eaway it ayam.
Ro rabies hay may 100% fatality rate rason nga eubus nga peligroso ag inde dapat pagbaliwalaon.
Ginklaro nana nga posibleng magmayad ro nina apang ro virus hay dahan-dahan ag depende kon man-uno kaeayo sa ueo ro angkit ag kon makaabot sa utok hay ulihi eon ro tanan ukon kamatayon ro abuton.
