Kalibo, Aklan- Ginakabig ni Punong Barangay Rexy Guevarra it Brgy. Lalab, Batan nga mabahoe nga hangkat sa anang pagdumaeahan sa baryo ro ginapangatubang nga problema it mga pumueoyo angot sa pagkalhit it maabong eangaw nga posibleng makatao it nagkaeain-eain nga sakit.
Raya hay kasunod it reklamo it mga pumueoyo sa makangiedlis nga pagkalhit it mga eangaw maghalin sa poultry farm nga kapin sa pitong dag-on eon nga naga-eksister sa lugar base sa paghuna-huna it kapitana.
Ro nasambit nga farm hay ginamanehar ni Marlyn Buyoc kon sa siin ro eangaw nga nagahalin sa andang negosyo hay bukon eamang it sa Brgy. Lalab nagapanaeasa kundi maging sa mga kaeapit nga barangay.
Ginpahayag dugang ni Guevarra nga kato pang buean it Mayo imaw nagpadaea it sueat sa natungdan nga departamento it lokal nga gobyerno it Batan bilang paunang tikang agud nga masolusyunan ro problema apang ko buean it Hulyo eamang sanda nag-inspection ag hasta sa makaron hay uwa pa it ginpaguwa nga resulta ro natungdan nga departamento.
Rason nga ginpaabot it kapitana ro problema sa Department of Environment and Natural Resources ukon DENR apang ginbalik sigon ro problema sa LGU bangud nga sanda dapat ro unang mag-aksyon kara bangud nga sanda ro nagatao it sanitary permit.
Angot kara, ginbalik it barangay council ro sabat it DENR sa LGU ag sa makaron hay nagahueat sanda kon anu ro magiging aksyon it munisipyo angot sa nasambit nga problema.
