KALIBO, AKLAN — Nakadepende sa naga katabong rebelyon makaron sa Marawi City ro pagpaeawig it deklarasyon it Martial Law sa Mindanao.
Sa interview it Bombo Radyo, gin pahayag ni Chief Presidential Legal Counsel Salvador Panelo nga gina tun-an pa ni Pangueong Rodrigo Duterte ro sitwasyon sa nasambitang lugar agud makadesisyon kun dudulog sa Kongreso agud paeawigon ro Batas Militar.
Suno kana nga ro naga padayun nga bakbakan sa Marawi City nga sa ika-25 diyas eon sa makaron hay sangka indikasyon nga grabe ro mga teroristang kaaway it gobyerno.
Apisar nga owa pa it ensaktong petsa kun san-o magawakas ro kaguluhan sa nabilin nga pwersa it Maute group, kumpiyansa si Atty. Panelo nga maeapit eon nga mabatyagan sa lugar ro kahilwayan maghalin sa terorismo.
Binatikos man kara ro mga kritiko it Pangueo nga nagasaka it petisyon sa Korte Suprema hanungod sa implementasyon it Martial Law nga mga bongoe ag bulag sigon sa mga naga katabo.
Samtang, apisar nga owa pa sigon nagapakita sa publiko, subsob sa gihapon sa trabaho si Pangueong Duterte.
