KALIBO, Aklan–Kapin sa 27 porsyento it mga tawo sa bilog nga kalibutan ro nagagamit it sigarilyo.
Nagaguwa man sa pagtuon nga mas maabu ro mga eaeaki nga nagasigarilyo kumpara sa mga kababayin-an.
Sa Pilipinas, naga-abot sa 35 porsyento it kabilugan nga populasyon ro naga-sigarilyo base sa datus it Food and Nutrition Research Institute (FNRI).
Suno kay Dr. Glenford Refre, Internist-Pulmonoligist nga maabu nga mga factor ro nakakaapekto sa sangka indibidwal nga nagagamit it sigarilyo.
Ro pagpanigarilyo hay mabuhay eon nga problema it nagkaeain-eain nga mga nasyon.
Ro tobacco ag vape ukon e-cigaritte hay sambilog sa mga nagapangunang risk factor it mga baeatian nga nagiging rason it pagkamatay.
Suno kay Dr. Refre, ro pagpanigarilyo hay maabu nga mga maeain nga tuga sa eawas rason nga importanteng bawasan ukon eubusan rayang likawan.
Nasayuran nga naga-abot sa 7,000 ka mga chemicals ro sueod it sigarilyo kung siin 60 hasta 70 sa mga nasambit nga kemikal ro pwedeng magkriar it cancer sa eawas it tawo.
Sambilog sa mga aktibong sangkap it sigarilyo hay ro nicotine, sangka kemikal nga may kapasidad nga bag-uhon ro pamatyagan it sangka tawo.
Pila sa mga baeatian nga pwedeng maangkon it sangka indibidwal tuga it sigarilyo hay ro Chronic Obstructive Pulmonary Disease (COPD), Asthma, Cancer ag pwedeng makaapekto sa reproductive system.
Ro pinakamanami nga maubra natun sa problema ngara hay pagtao it nagakaigo nga edukasyon ag suporta sa mga tawong amat-amat nga nalulong sa pagsigarilyo.
