KALIBO, Aklan — Uman nga ginhugtan it lokal nga probinsiya it Aklan ro pagpasueod it mga buhi, kinatay, eaha ag ginproseso nga karne it baboy bangud sa uman nga pagpanaeasa it African swine fever sa ibang probinsiya.
Nauna eon nga ginpahayag it Office of the Provincial Veterinarian nga pilang banwa eon sa Aklan hay ginbutang sa pink zone ukon buffer zone rason nga nag-instrikto ro kapitolyo sa pagpasueod it mga baboy.
Nakabaehag sa Executive Order No. 069 Series of 2024 nga pirmado ni Aklan Governor Joen Miraflores, ukon mandu nga naga-amyenda sa EO 61 ko nagtaliwan nga dag-on angot sa sangka ordinansa nga nagahimo it mga pamaagi agud nga matapna ag makontrol ro ASF sa probinsiya ag nagapapanaog it penalidad sa sin-o man nga maga-eabag nga kun sa siin hugut nga ginabawae it kapitolyo ro pagpasueod it mga baboy nga nagahalin sa mga lugar nga apektado it ASF.
Kaibahan man kara ro mga delivery sa kaiping nga mga probinsiya nga naga-agi sa Aklan.
Kinahangean anay nga magbo-oe it Certificate of Transshipment halin sa OPVET ro mga shipment nga halin sa ASF free areas nga maga-agi sa Aklan eakip ro local shipping permit paagto sa andang destinasyon .
Raya hay kasunod it pagtaas it kaso it ASF sa Occidental Mindoro ag Batangas nga sambilog sa mga naga supply it baboy sa Aklan nga nagduso kanda nga magdeklara it state of calamity.
Ginmanduan man it provincial government ro tanan nga mga lokal nga gobyerno sa Aklan nga mas pa nga ayuson ro biosecurity measures sa mga naga-alaga it baboy eabi eon ro backyard raisers agud nga makabulig nga makalikaw sa ASF.
Nasayuran nga ro mga banwa it Banga, Balete, Malinao, Madalag, New Washington, Numancia, ag Kalibo hay napasaka ro andang ASF zoning status halin sa red hay naging pink zone eon ko Hunyo 16 matapos nga magtuhaw ro outbreak sa Aklan ko Abril 12, 2023.
