KALIBO, Aklan —- Nagapati si dating Sangguniang Panlalawigan Member Atty. Harry Sucgang nga ro peace negotiation sa gihapon ro makasolbar sa giyera nga nagapatunga makaron sa Israel ag militanteng Hamas it Palestine.
Raya hay maskin nga makapilang beses eon nga ginhana nga ayuson ro bagina pinaagi sa sangka kasugtananan sa gintawag nga Oslo Peace Treaty.
Apang ro banggi-anay hay owa nagtapos ag nagapadayun hasta makaron.
Gindugang pa ni Atty. Sucgang nga sa sangka giyera hay owa it may nagadaog kundi ro tanan hay pierde kapareho man sa nagakatabu sa tunga it Russia ag Ukraine.
May mabahoe sigon raya nga epekto sa ekonomiya sa bilog nga kalibutan.
Samtang, ginsaysay ni Atty. Sucgang nga ro giyerang nagakatabu sa tunga it Israel ag Palestine hay nag-ugat pa sa pagtabok ni Moses ag mga ulipon nga Hudyo it Egypt sa Canaan.
Ginapanindugan sigon it mga taga-Gaza Strip nga sanda nga mga Palestino ro orihinal nga nagapanag-iya Canaan.
Ginabasehan mat’a it Israel ag kaalyado kara nga mga Christian nations hay puro biblical.
Ro Canaan sigon ro eugta nga ginpromisa it Diyos kay Moses nga igatau sa Israelites.
Kilaea suno kana ro mga Hudyo kato nga paniempo nga owa it kaugalingon nga eugta apang ginturo sigon sanda it Diyos sa promise land nga imaw ro gina-agawan makaron.
Base sa bibliya ro Palestine gid man ro tag-ana it eugta bangud nga ro Israel hay ginapalibutan it mga Arab nations.
Suportado sigon it Estados Unidos ag Canada ro Israel rason nga indi raya mapierde it Palestine.
Nagapati imaw nga ginapabay-an anay it Amerika ro nagakatabu nga pagbaeos it Israel agud nga mabatyagan it Hamas ro resulta it andang naging aksyon ukon matur-an ro mga raya it leksyon.
Ro nasambit nga isyu hay ginatugyan eon sa United Nations para sa pagresolba sa owa pagka-ilintindihan.
