Ginpaandamanan it Department of the Interior and Local Government (DILG) nga nagapabilin nga suspendido ro operasyon it “Peryahan ng Bayan” (PnB) sa tunga it pilang ka mga reports it nagapadayon nga mga operasyon kara sa nagakaeain-eain nga lugar.
Ginmandu ni DILG Sec Eduardo Ano sa mga lokal nga gobyerno ag Philippine National Police nga i-monitor ag pagatutukan ro kampaniya kontra sa iligal nga aktibidad.
Suno sa DILG, may pilang ka mga lugar ro padayon nga naga-operate it Peryahan bangud sa may pilang operators sigon ro nagapresenta it writ of execution nga gin-isyu it Pasig Regional Trial Court (RTC) Branch 161 ku nagtaliwan nga Enero 24, 2020 para pagasugtan it awtoridad ro andang operasyon.
Mataeopangdan ku nagtaliwan nga Enero 29, 2020 nag-isyu it sangka memorandum si Executive Secretary Salvador Medialdea sa Philippine Charity Sweepstake Office (PCSO) para pagataw-an it kaklaruhan ro pagbalik it operasyon it Peryahan ng Bayan nga raya hay nagapabilin nga suspendido.
Suno pa kay Ano nagapabilin nga suspendido ro Peryahan apang sa oras nga ro nasambit nga order hay pagabaliktaron it parehong korte ukon korte nga may mas mataas nga hurisdiksyon.
Sa pihak nga parte ku nagtaliwan nga 2019, nagpatigayon ro NBI it imbestigasyon may kaangtanan sa failure it PCSO para sa pag-remit it kapin sa bilyong revenues maghalin sa mga operasyon it Small Town Lottery ag Peryahan ng Bayan.
