KALIBO, Aklan—Ginahueat eon lang makaron it Provincial Health Office (PHO) ro mga representante it Department of Health (DOH) ag Research Institute for Tropical Medicine (RITM) nga sanda ro maga-assess sa gintukod nga molecular laboratory it gobyerno probinsyal nga makit-an sa compound it Aklan provincial hospital.
Suno kay Provincial Health Officer 1 Dr. Cornelio Cuatchon Jr. ginatinguhaan man nanda nga makapasar ro ginhimo nga laboratoryo agud nga inde eon maghueat it pilang adlaw antes nga masayuran ro resulta it swab test nga ginabueo sa mga ginakabig nga suspected ag probable case it Covid-19.
Ginpahayag dugang nga naka-initial training eon man ro mga doctor ag medical staff nga sanda ro magadumaea it nasambit nga laboratoryo.
Nasayuran nga kinahang-ean pa nga daehon ro mga swab specimen sample sa Western Visayas Medical Center, ro sub-national laboratory it Department of Health (DOH) agud masayuran kon ro sangka indibidwal hay may daea nga virus pasueod sa probinsya it Aklan.
Partikular sigon nga ginaboe-an it swab sample ro mga ROF’s nga masobra sang dominggo eon nga naboe-an it swab test sa Metro Manila antes pa man nakauli, ro mga LSI nga halin sa high risk areas ag ro mga symptomatic nga may travel history sa mga lugar nga nakalista it mataas nga kaso it Covid-19.
