NEW WASHINGTON, Aklan—Nag-alburuto ro pilang mga residente it Sector 1 it Brgy. Mabilo, New Washington matapos nga ginsueod it tubi-dagat ro andang mga baeay, bandang alas-12:30 kaina it aga-aga .
Suno kay Ma. Encarnacion Jorda, sambilog sa mga apektadong residente nga nabugtaw eon lang sanda nga basa eon ro andang mga eugban ag iba pang mga gamit.
Haeos nag-abot sigon sa buko-buko hasta sa tuhod ro tubi-dagat nga nagsueod sa andang mga kabaeayan nga nagdungan sa high tide.
Ro masubo pa sigon hay naapektuhan pati ro andang pangabuhian matapos nga nag-awas ro andang katangkehan ukon fish pond nga may sueod nga mga bang-eos ag alimango.
Mabahoe sigon raya nga kapiyerdihan kanda bangud nga owa eon sanda it pagaeauman nga ma-harvest kun sa siin ro gingamit nga kapital hay inutangan eamang.
Sa pihak nga parte, ginsaysay ni Edward Torres, sambilog pa sa apektadong residente nga raya ro unang kahigayunan nga ginsoe-ob it tubi-dagat ro andang mga baeay.
Suno kana nga umpisa nga gin-akaran it baeas it munisipyo ro gin construct nga tulay nga nagakonekta sa Brgy. Tambak ag Brgy. Mabilo ko buean it Hunyo hay nagasueod eon sa andang sapa ro tubi halin sa dagat.
Hinyu nanda nga maaksyunan it lokal nga gobyerno ro andang problema sa mas madali nga tiempo.
