KALIBO, Aklan—Magapatigayon it localized translacion ro pilang mga simbahan ag kapilya sa probinsiya it Aklan kadungan sa kapistahan it Black Nazarene.
Suno kay Truly Flaviano Jr., deboto it Itom nga Nazareno nga tuyo kara nga mataw-an it kahigayunan ro mga deboto nga makatambong sa mga novena masses ag fiesta mass sa guwa it Quiapo Church.
Igapatigayon suno kana ro mga localized celebration sa mga banwa nga gindaehan it imahe it Nazareno.
Pila sa mga pagahiwatan it misa ag prusisyon hay sa Kalibo Nazareno chapel sa Brgy. Libtong, Kalibo, simbahan sa Rosario Malinao, New Washington, isla it Boracay kamana man sa banwa it Kalibo sa Ati-Atihan Festival ag iba pang lugar.
Ro pinaka selebrasyon hay sa isla it Boracay kun sa siin may pagahiwaton nga motorcade sa Enero 30.
Sa pihak nga parte, ginpahayag ni Flaviano nga maabu ro makapamatuod nga mapaghimala ro Black Nazarene rason nga dagsa ro anang mga deboto.
Naging panata suno kana it mga deboto nga nagasimba kada fiesta it Nazareno ag nagasunod sa prusisyon agud nga ipaabot ro hantup sa tagipusuon nga pagpasaeamat sa nataw-an it katumanan nga mga pangamuyo eabi eon ro mga nagmayad sa baeatian.
