KALIBO, Aklan—Nagbuylog ro Police Regional Office ukon PRO 6 sa bilog nga Philippine National Police ag sa National Police Commission ukon NAPOLCOM sa dueueungan nga kick-off ceremony it 29th Police Community Relations Month nga may temang “Ligtas ka sa Bagong Pilipinas” nga ginpatigayon sa PRO 6 Multi-Purpose Hall, Camp Gen. Martin Teofilo Delgado sa Iloilo City ko adlaw it Lunes, Hulyo 1, 2024.
Suno kay P/Lt. Col. Arnel Solis, tagapaghambae it PRO-6 nga kadungan it nasambit nga aktibidad ro Monday flag raising ag awarding ceremony para sa mga nagakabagay nga mga tawuhan it PRO 6 ag mga stakeholders.
Ro nasambit nga okasyon suno kana hay gintambungan ni Atty. Jerome Asuga, Regional Director it NAPOLCOM, Regional Office 6 bilang guest speaker.
Nagtambong man sa aktibidad ro PRO-6 command group, mga regional ag personal staff, mga hepe ag tawuhan it national support units, ag mga tawuhan it PRO 6.
Ro dueueungan nga selebrasyon hay nagapakita it pagbuylog ag dedikasyon it PNP sa pagserbisyo sa mga pumueuyu.
Ginpamilit ni Solis nga pinaagi sa makarondaya nga mga programa ag inisyatiba, ro PNP hay padayun nga nagatau it importanteng serbisyo ag proteksyon sa publiko paagto sa Bagong Pilipinas.
