Proposesyong laye nga nagatao it tax exemptions para sa donasyon sa mga national athletes nga naga pamalas it andang talento sa international sports competition aprubado eon it House Committee on Ways and Means sa pag pangunna ni Albay Rep. Joey Salceda.
Suno kay Salceda ro nasambit nga proposesyon hay dapat naka pangaean man sa Pinoy gymnast nga si Carlos Yulo, ro kauna-unahang Olympian nga nakasungkit it magkasunod nga gold medals.
Sa anang sponsorship remarks sa nasambit nga proposesyon, hay gina taw-an it diin ni Salceda nga 12-anyos paeamang si Carlos Yulo kat nagpa interview raya it anang mismong handom nga makasungkit it gold medal sa Olympics para sa Pilipinas ag masubra sa sang dekada pa ro anang gin-eaan bago mabuoe ro bueawan nga medalya.
Suno kay Salceda ro leksiyon kara hay ro premyo nga indi eagi mabuoe-buoe sa adlaw it kompetisyon kundi sa haba it panyempo nga naga kinahang-ean it hard work, ag determinasyon.
Ginhaon ni Salceda ro House Bill No. 421, nga inaprubahan ko 18th Congress rong “Hidilyn Diaz Law” apang uwa raya naka eosot sa Senado.
Ro nasambit nga proposesyong laye hay naga-exempt sa mga premyo nga ginatao it mga brands ag kumpanya matapos magdaog.
Importante man nga mag-angkon it tax exemptions sa mga donasyon sa andang mga training sang dag-on bago ro kumpetisyon.
Inaprubahan man it komite nga himuon nga retroactive ro exemption hasta sa Enero 1, 2024.
Sa pihak kara sa pag-exempt it mga donasyon sang dag-on bago ro petsa it kompetisyon, ginhambae man ni Salceda nga ro mga donasyon sa pamaagi it Philippine Sports Commission o Philippine Olympic Committee hay himuon nga exempted sa mga donasyon anuman nga oras.
