Padayun nga nagapangayo it hustisya ro pamilya ni Jennifer Zaulda sa natabu nga paghimueos ag pagpatay kana kamana man ro pagpilak kana sa irigasyon sa Brgy. Mataphao, New Washington ko August 22, 2019.
Raya hay kasunod it gina alegar nga uman nga pagpabatyag nana sa anang pamilya partikular ro pagpadamgo sa anang mga igmanghud.
Suno kay Renalyn Zaulda nga haeos sunud-sunod nga gabi-i nga nagpadamgo ro anang magueang nga nagatangis ag nagapangayo it bulig angot sa anang kaso.
May kahigayunan man sigon nga gulpi eamang nga nakakahugum sanda it kandila .
Angot kara, nagapangayo sanda it bulig sa mga natungdan agud nga uman nga mabuksan ro kaso ag mataw-an it hustisya ro pagkamatay it anang magueang, kun sa siin, ro ginadudahan sigon nga may kahimuan hay nagapabilin nga nakahilway sa makaron.
Dugang pa nga may napakulong eon dati angot sa nasambit nga kaso apang makataliwan ro limang buean hay na-abswelto bangud sa kakueangan it ebidensiya ag mga testigo.
Sa pihak kara, ginpahayag it pamilya Zaulda nga padayun sanda nga nagahueat it hustisya para sa naduea nga kabuhi it anang magueang ag mataw an it kalinong ro anang kaeag sa pihak nga kinabuhi.
Madumduman nga ulihing nakitang buhi ro biktima sa sangka birthday party it sangka SK official sa nasambit nga lugar, apang bandang alas-2 it aga-aga hay nag-ea-ong nga maga-uli kaibahan ro ginaturo nga suspek.
Nakita eon lang ro daeaga nga owa eon it kabuhi nga naga-eutaw-eutaw sa irigasyon nga owa it anuman nga eambong bandang alas- 5:00 it aga-aga .
Ag ulihi raya nga nakit-an nga buhi sa oras nga alas-2:00 it agahon kaibahan ro suspek.
Nakit-an lang ro eawas it biktima banda alas-5:00 it agahon sa irigasyon nga owa eon it kabuhi.
