KALIBO, Aklan — Nagdihon it resolusyon ro Sangguniang Bayan it Kalibo nga nagasuporta sa rekomendasyon it mga farmers organization nga magadeklara it state of calamity sa bilog nga banwa it Kalibo bangud sa waeong buean nga pagpasarado sa irrigation system it National Irrigation Administration (NIA)-Aklan.
Ginaeauman sigon it mga mangunguma ro pagnaba it produksyon it bugas sa Aklan bangud sa kakueangan it tubi sa mga irigasyon.
Kapin sa 5,000 ektarya it paeayan ro apektado it pagpasarado it kanae it NIA nga nag-umpisa ko Oktubre 1 ag magabuhay hasta sa Hunyo it masunod nga dag-on agud taw-an it daean ro konstruksyon para sa improvement it irrigation system.
Ro proposisyong pagpaidaeom sa state of calamity sa Kalibo hay aprubado it Municipal Agricultural and Fishery Council sa ginpatigayong pueong.
May kaangtanan kara, ginaengganyo man ro provincial government ag iba pang mga local government units nga apektado it pagpasarado it irigasyon nga magdeklara man it state of calamity.
Mag-eowas kara, ginaengganyo man it Municipal Agriculture Office ro mga mangunguma nga ipa-insured ro andang paeayan sa Philippine Crop Insurance Corporation agud makabaton man it benepisyo sa anumang kalamidad nga matabo.
