NEW WASHINGTON, Aklan—Ginpasiguro it barangay council it Brgy. Jugas, New Washington nga pagataw-an nanda it aksyon ro makapilang beses eon nga nairecord nga panakawan sa andang barangay.
Sa kamatuoran suno kay kagawad Rommel Pronton, sambilog raya sa andang agenda sa igapatigayon nga session sa adlaw it Martes.
Una kara, ginsueod it uwa makilaea nga manakaw ro sangka unit it pabaeay sa nasambit nga lugar kon sa siin natigayon nga matakaw ro bugas ag pilang ka mga grocery.
Posible suno kay Pronton nga mga pamatan-on ro sa likod it panakawan bangud sa makapilang beses eon raya natabo nga partikular nga ginasueod hay ro mga unit nga uwa haeos it tawo.
Ginapangbuoe ro kable it kuryente ag iba pang bagay nga mapuslan.
Mag-eowas kara, may pilang ka insidente man it panakawan ro nag-eontad sa nasambit nga lugar partikular sa eskwelahan ag pilang ka panimaeay.
Ginpadumdom man ni Pronton ro mga pumueoyo sa lugar nga maging alerto ag mag-aligmat sa andang palibot bangud sa nagkaeain-eain nga tawo ro nagaistar sa nasambit nga barangay.
