KALIBO, Aklan—Nag-implementar eon it 24 oras nga curfew ro Saudi government matapos nga nataeopangdan ro padayon nga pagtinaas it kaso it 2019 coronavirus disease ukon COVID-19.
Suno kay Bombo International Correspondent Alma Fulgencio sa Riyadh, Saudi Arabia, hugot sigon makaron nga ginapatuman ro 24 oras nga curfew sa tanan nga mga tawo agud nga makontrol eon ro pagkalhit it COVID-19 sa nasyon.
May kaangtanan kara, naging preparado ro mga tawo matapos nga may bastante sanda nga pagkaon nga naka-stock sa sueod it andang baeay.
Maskin nga may naga-iral nga lockdown hay uwa it panic buying nga natabo bangud nga bastante sa pagkaon ro mga pumueoyo.
Ginlaygayan man suno kana ro tanan nga sundon ro physical distancing maskin sa sueod it baeay ag ugalion nga magsuksok it face mask kon nagaguwa partikular kon nagabakae it bueong ag iba pang kinahang-eanon.
Hugot nga ginapatuman it Saudi government sa mga pumueoyo ro andang polisiya bangud nga ro inde magsunod kara hay may kaakibat nga penalidad.
