KALIBO, Aklan—Gina-umpisahan eon it sangguniang bayan it Kalibo ro cleansing ukon paglimpyo sa listahan it mga franchise holder it mga tricycle operators sa banwa it Kalibo.
Suno kay SB member Matt Aaron Guzman, chairman it committee on transportation nga raya hay matapos nga matukiban nga kaabuan sa mga franchise holder hay bukon it taga-Kalibo.
Nakataeana sigon sanda nga makipagpueong sa mga naka-pending ro application bangud sa nagkaeain-eain nga kaso.
Pagataw-an sigon nanda it kahigayunan ro mga operators nga maka-justify nga tumandok gid man sanda it Kalibo.
Tuyo kara nga mabawasan ro numero it mga nagabiyahe nga tricycle ag mabutang sa ensakto ro tanan.
Samtang, ginduea man ni Guzman ro pagkabaeaka it mga tricycle operators bangud nga kon makasumite sigon sanda it kompletong requirements hay mataw-an sanda it prangkisa.
Sambilog eon kara ro pagiging registered voter it banwa it Kalibo, water ag electric bills nga magapamatuod nga residente it banwa.
Sa oras nga maaprubahan ro aplikasyon hay pagataw-an pa sanda it 180 diyas nga amnesty agud nga maayos ro mga kakueangan.
Ginpadumdum it opisyal nga ro pagtau it franchise hay sangka pribilihiyo ag bukon it kinamatarung.
Rason nga makabig eamang sanda nga holders kara sa sueod it tatlong dag-on ag sa oras nga ma-expire hay pwede raya nga ma-revoke, makansela ukon mabawi it konseho.
Ginkumpirma dugang ni Guzman nga epektibo eon ro “one motorized tricycle operator’s permit ukon franchise, one holder/operator policy” ag pagapabaskugon pa sa oras nga mapatuman ro new traffic code it Kalibo.
Samtang, owa sigon nanda ginapasugtan ro pagbaligya it franchise.
Ro mga operators nga may daywang franchise hay gina-abisuhan nga i-transfer ro sambilog nga prangkisa sa andang asawa ukon unga.
Nakasanayan eon sigon it mga franchise owners nga ibaligya ro andang prangkisa it kapin sa P100,000.
Apang raya hay hugut nga ginabawae it ordinansa.
Angot kara, plano it SB nga magpatuman it goodwill fee nga kapin sa 7,500 hasta 10,000 pesos agud nga maprotektahan ro posibleng buyer.
