KALIBO, Aklan — Eubos nga nagpasaeamat si Senador Sonny Angara kay Pangueong Ferdinand R. Marcos Jr. sa pagsalig nga gintao kana bilang bag’ong gintaeana nga Sekretaryo it Department of Education.
Suno kay Angara, ginbaton nana nga may pagkapamapainubuson ro responsibilidad nga gintao kana it punong ehekutibo.
Bilang bag’ong Secretary it DepEd suno kana hay nakatuon imaw sa pakikipagbuligan sa tanan nga sektor it sosyudad kaibahan ro anang binayluhan nga si Vice President Sara Duterte.
Raya hay agud masiguro sigon nga ro kada Pilipino hay may access sa de-kalidad nga edukasyon.
Nagapati si Angara nga ro edukasyon ro pundasyon it paeaabuton it nayson, ag raya hay paagi sa tingob nga pagtinguha nga masabat ro mga hangkat ag samantalahon ro mga oportunidad sa paeaabuton.
Ginakaeangkagan sigon nana nga buligan si Pangueong Marcos ag bilog nga administrasyon nga serbihan ro mga estudyante, suportahan ro mga manugturo ag pasangkaron ro pagtanan nga kalidad it edukasyon sa atong nasyon.
Si Angara hay nagtapos it Masters of Law sa Harvard University, nagserbi bilang senador halin 2013 hasta sa presente, naging kongresista it Aurora halin 2004 hasta 2013, ag sambilog sa mga nagasueong it layi sa edukasyon kapareho it Kabalikat sa Pagtuturo Act, Excellence in Teachers Education Act, Universal Access to Quality Tertiary Education Act o Free College Law, Student Fare Discount Act, K to 12, Open Learning and Distance Education Act, Anti-Bullying Act ag maabong iba pa.
