Posibleng maganaba eon ro sukot sa kuryente sa buean it Hunyo kasunod sa pagbawas sa konsumo it mga konsumidor ag pagnaba it presyo it wholesale electricity.
Raya ro ginpasiguro it Electric Cooperatives Association of Region VI.
Ginpahayag nga ro nataeupangdan nga pagtaas sa electricity bills ko Abril hay temporaryo eamang.
Daywang nagapangunang factors sigon ro rason kara nga ginaeakipan it pagtaas sa power consumption it mga konsumidor ag ro pagsaka it presyo sa Wholesale Electricity Spot Market (WESM).
Kapin sa 16.94 percent ro nakita nga pagsaka sa power consumption ko Abril 2024, ukon katumbas it pagtaas it halin sa 25,963 kilowatt-hours ko Pebrero sa 27,389 kilowatt-hours ko Marso hasta nga nag-abot sa 30,360 kilowatt-hours ko Abril.
Kadungan kara ro pagtaas man it electricity prices sa WESM halin sa P6.55 per kilowatt-hour ko February sa P12.02 per kilowatt-hour ko March, P15.71 ko April ag P8.48 per kilowatt-hour makaron nga buean it mayo tuga it pagtaas sa demand sa bilog nga rehiyon.
Madumduman nga nauna eon nga nagpaguwa ro National Grid Corporation of the Philippines (NGCP) it 57 tanan nga red alerts ag 157 nga yellow alerts umpisa ko Enero hasta mayo it makaron nga dag-on nga sangka indikasyon nga mataas ro demand para sa power supply sa bilog nga nasyon.
