Nag-pela ro pamilya sa bumaril ag pumatay sa biktimang si Darius Zaspa nga boluntaryong magguwa ag magsurender eon samtang may tiempo pa.
Suno kay Letecia Rapiz, tiya it biktima nga mas mayad nga magsurender eon ag atubangon ro posibleng igapasaka nga kaso kontra sa suspek nga si Ricky Rapiz.
Dugang pa kara nga maskin sanda hay nangawa kon ham-an nga ginbaril it suspek ro biktima sa pihak nga si Zaspa ro nagbulig ag nagrescue sa anang mga unga ko tiempo it pagpanaeasa it bagyong Frank.
Ginsugae sigon kara ro anang kabuhi agud nga maeowas ro anang mga unga bangud nga owa ro suspek ko tiempo nga tumama ro bagyo ag na-trap ro anang mga unga halin sa nagatinaas nga baha.
Owa man sigon sanda nakasayod kon may gin-awayan ro daywa bangud nga owa man it napabalita sa andang lugar.
Antes nga natabu ro insidente, hay nakabati sanda it tatlong sunud-sunod nga eupok it baril.
Nagapati man sanda nga naka-inom si Rapiz rason nga nahimo ro krimen.
Madumduman nga kabi-i bandang alas-9:15 ro pang-orason hay ginbaril it makapilang beses si Zaspa samtang nagapauli halin sa sangka baraka sa pagbakae it sigarilyo nga gin tunaan it anang hinali nga kamatayon.
Nadaea pa raya sa aklan provincial hospital, apang patay eon kat maka-abot.
Nagapadayun pa ro imbestigasyon it pulisya sa nasambit nga insidente.
