Kalibo Aklan ———Natigayon eun nga mapasakaan it kaso nga pag-eabag sa RA 8353 ukon Anti-Rape Law ro sangka 19 anyos nga soltero nga gina-alegar nga naghimueos sa 15 anyos nga dalagita nga tubong Buruanga, Aklan ko petsa 15 it Abril sa Libertad, Antique.
Apang ginklaro ni PCapt. Josielito Yana, OIC Chief of Police it Libertad Municipal Police Station nga owa it natabo nga pagpamersa sa biktima bangud sandig sa panaysayon it biktima sa mga otoridad hay personal rayang nagsunod sa suspek bangud nga owa eun imaw naila nga mag-uli sa andang panimaeay.
Dugang pa kara nga nahueog ro kaso sa Statutory rape ukon owa ginpuwersa ro biktima agud nga makipaghieawas apang raya hay isaeang ka menorde edad pa.
Samtang ginpahayag man ni Yana nga na-delay ro andang pagpasaka it kaso bangud nauna nga nagpamilit ro pamilya it biktima nga sanda eun lang ro magapasaka it kaso apang ko ulihi hay ginbalik man raya kanda.
Samtang, ginklaro man it Libertad PNP nga owa sanda nagpabaya sa kaso ag kamatuoran sigon kara hay andang gin-asistiran ro biktima ag anang pamilya kat nagdangop sa andang taeatapan.
Madumduman nga nagdangop sa Bombo Radyo ro biktima kaibahan ro anang pamilya matapos nga owa sigon makumbinsi sa tikang nga ginahimo it mga otoridad agud nga mapadasig ro paghueag it kaso.
