KALIBO, Aklan — Uman nga gina-monitor it lokal nga gobyerno it Kalibo ag kapulisan ro pagkalhit eon man it mga nagapakalimos nga mga Badjao sa nagapangunang karsadahon sa banwa it Kalibo.
Suno kay Sangguniang Bayan member Ronald Marte nga pabalik-balik eon ro andang pagpadumdum sa mga gina-rescue nga mga nagapakalimos nga Badjao kun sa siin kon amat may kaibahan pa nga mga eapsag ag mga unga.
Ro mga nauna eon nga na-rescue hay ginapa-idaeum sa profiling it Municipal Social Welfare and Development Office , Kalibo PNP ag iba pang natungdan nga ahensiya it gobyerno kun sa siin partikular nga ginatumod hay ro andang address iya sa Kalibo ag kon naeakip eon sanda sa anumang programa it LGU .
Ginamanduan sigon ro mga raya nga mag-uli sa andang ginhalinan nga probinsiya.
Naalarma ro pilang mga pumueuyu bangud nga mag-eowas nga pilitaryo kon nagapakalimos hay naakig pa ag nagapanakit kon indi pagtaw-an .
Dugang pa ni SB Marte nga posibleng nagabalik-balik ro mga Badjao sa Kalibo bangud nga maalwan ro kaabuan sa mga Kalibonhon rason nga madasig sanda nga nakakatipon it kwarta halin sa pagpakalimos.
Sa pihak nga parte, bangud sa sunud-sunod nga mga kaso it panakawan sa banwa it Kalibo, apela it opisyal nga makipagbueuligan ro mga pumueuyu sa mga awtoridad sa pagbantay sa andang palibot ag insigidang i-report sa police station kon may mataeupangdan nga makadueudang indibidwal.
