KALIBO, Aklan—Naging matawhay ro unang adlaw nga implementasyon it checkpoint it Commission on Election ukon Comelec ag Philippine National Police sa banwa it Kalibo, aga-aga it domingo, Enero 12.
Raya ro ginpahayag ni Atty. Christian Itulid, election officer it Comelec-Kalibo kasunod it pag-umpisa it election period ag gun ban para sa midterm elections.
Dugang pa kara nga hasta makaron nga adlaw it Lunes hay owa sigon sanda it nailistang nag-eabag sa gun ban sa gintukod checkpoint sa bukana it Kalibo-Numancia bridge.
Nagpaandam imaw nga ro sin-o man nga madakpan nga nagadaea it baril hay pagakasuhan it pageabag sa Omnibus Election Code partikular ro Comelec Gun Ban nga may penalidad nga sang dag-on hasta an-um nga dag-on nga pagkakulong.
Ginpaathag pa ni Atty. Itulid nga ro pagpatuman it Comelec Checkpoints hay kaparte it security protocols agud nga mabaeabagan ro anumang kinagamo sa nagahilapit nga eleksyon .
Magabuhay ro gun ban hasta sa June 12, 2025.
Sa nationwide gun ban, hugut nga ginabawae ro pagdaea it baril it sin-o man nga sibilyan mag-eowas eon lang kon may permit ukon sertipikasyon halin sa Comelec.
Ro mga mga pulis ag soldado eamang ro otorisadong magdaea it baril kaibahan ro dokumento nga nakabutang ro andang pangaean, ranggo ag deployment.
Ro checkpoint inspection suno kana hay ginadumaeahan it mga pulis ag militar ag ginpatuman ro “plain view doctrine”.
Indi kara pwedeng buksan ro saeakyan ukon compartment sa checkpoint.
