KALIBO, Aklan—Bangud sa pagtinguha ag eubus nga pagsalig sa Diyos, natuman ni Atty. Clement Del Rosario, residente it banwa it Kalibo ro anang handom nga makapasa sa 2019 Bar Examination ag maging abogado.
Suno kana, uwa nana gin-ekspektar nga mapadayon sa kursong pagka-abogado bangud nga confuse raya sa anang kaugalingon kon anu gidman ro anang gusto hasta nga nakasueod imaw sa San Agustin church ag idto gintugyan ro tanan.
Ginsakripisyo sigon nana ro tanan bangud nga sayod imaw sa anang kaugalingon nga bukon it madali ro anang magiging journey rason nga nagfocus imaw sa anang pagtuon.
Ginpahayag dugang ni Atty. Del Rosario nga uwa imaw it social life samtang naga-eskwela hasta sa tyempo eon it pagreview ag mismong buean it examination.
Gintiisan sigon nana ro tanan ag makaron hay nakaginhawa eon imaw it madaeom matapos nga sambilog ro anang pangaean sa 2,103 nga mga nakapasa sa prestihiyosong examination halin sa 7,685 nga aspirants.
May kaangtanan kara, eubus sigon ro anang pagpasaeamat sa anang bilog nga pamilya ag sa mga tawo nga una sa anang eoyo sa kabilugan it anang journey.
Si Atty. Del Rosario hay nag-elementarya sa Aklan Learning Center; nag-sekondarya sa Aklan Valley Highschool; nagtapos it Bachelor of Science it Business Administration sa University of San Agustin ag idto man nana natapos ro kurso nga abogasiya.
