KALIBO, Aklan—Ginaeauman makarun nga magabuhos ro numero it mga pasahero nga magahugpa sa Kalibo International Airport matapos nga magpatuman it mas haeuga nga pagsinueondan sa bilog nga probinsya it Aklan.
May kaangtanan kara, ginpasiguro ni Civil Avaition Authority of the Philippines ukon CAAP-Aklan Manager Engr. Eusebio Monserate Jr. nga haom ro pasilidad ag mga empleyado it paeuparan sa posibleng pag aeabutan it mga turista.
Makabig man sigon raya nga welcome development bukon eamang it sa mga empleyado it paeuparan kungdi pati man sa mga negosyante ag mga pomoeuyo it probinsya.
Nasayuran nga umpisa sa Pebrero 10 hay ginapasugtan eun ro pagbatun it mga foreign tourist nga gustong magbisita sa Isla it Boracay.
Ro mga pagaeauman nga turista hay maghalin sa Korea, China ag Asean countries.
Ro mga kinahangean eamang nga ipakita agud nga makasueod sa probinsya hay ro WHO certificate para sa mga fully vaccinated individuals samtang negative RT-PCR test man para sa mga bukon it bakunado.
