KALIBO, Aklan—Ro rabies hay isaeang ka masakit tuga it virus nga nagakalhit pamaagi sa eaway it sapat nga may impeksiyon it rabies ag naipasa sa sangka tawo ukon ibang sapat.
Puwedi man raya nga magtapon kung naeawayan it sapat nga may rabies ro nina ukon naeawayan ro imong mucous membranes kapareho it mata ukon bibig.
Suno kay Dr. Glenford Refre nga ro rabies hay tuga it rabies virus.
Ro virus hay nagakalhit sa kaeawasan hasta nga makaabot ag maimpeksiyon ro utok, ag raya hay nakakamatay.
Matapos nga ma-angkit it sapat nga may rabies, ro virus hay nagapabilin sa eawas it sangka tawo.
Masami nga nagapabilin ro rabies virus it mga isaea hasta tatlong buean ukon ro ginatawag nga incubation period maeapit sa parte it kaeawasan kun sa siin raya nakasueod, kapareho it nina ukon sa mga bukas nga parte it eawas kapareho it bibig ukon mata.
Hasta nga ro virus hay magpanaw ag maga-agi paadto sa utok ag maghalin idto hay uman nga magabalik ag maga-agi sa mga ugat ag magakalhit sa tanan nga parte it kaeawasan.
Ro anuman man nga klase it sapat hay puweding magpakalhit it rabies kapareho it paniki, kuring apang ro masami gid hay ro ayam.
Agud nga malikawan ro rabies dapat nga makaangkon it tama nga pagdepara sa mga kasapatan sa panimaeay.
Taw-an sanda it bakuna ag indi sanda pagpasugtan nga makaeapit sa mga ibang sapat sa guwa.
Kung nagaguwa, maghaeong sa mga nagawinarang nga kasapatan.
Kung kinahangean nga mag-adto sa mga lugar nga may mataas nga kaso it rabies, magpabakuna anay bilang proteksiyon.
