KALIBO, Aklan—Syento porsiyento eon nga haum ro Police Regional Office 6 para sa maabot nga eleksyon sa Mayo 12.
Suno kay PRO-6 spokesperson Lt. Col. Arnel Solis nga umpisa ko Mayo 3 hay naka-full-alert eon sanda agud nga masiguro nga eowas ro paghatud it mga materyales nga pagagamiton sa eleksyon ag padayun nga mapatuman ro mga laye angot sa kaeowasan it publiko sa bilog nga banwa ag siyudad sa Western Visayas.
Target sigon nanda nga makaangkon it eowas, maayos ag malinong nga proseso it eleksyon sa bilog nga rehiyon.
Ginpasiguro nana nga ro mga kapulisan hay magabantay sa tanan nga mga polling centers.
Ginpahayag pa ni Solis nga kasado eon ro andang regional security plan, kun sa siin ginatutukan ro pagtapna sa mga pagpamaeag ag mapabilin ro kaayusan sa bilog nga tiempo it eleksyon.
Kaibahan kara ro regular nga pagpatigayon it Comelec checkpoints, ginpabaskog nga operasyon kontra-krimen ag ginpabaskog nga intelligence gathering ag pag-deploy it dugang nga mga pulis sa mga lugar nga nagakinahangean .
Sa pihak nga parte, maskin nga may naeakip nga mga lugar sa election areas of concern sa Western Visayas partikular sa Iloilo province, apang hasta sa makaron hay owa sanda it may na-monitor nga anuman nga paeag nga pwedeng maka disturbo sa peace and order situation.
Samtang, base sa pinaka-ulihi nga datos halin ko buean it enero hasta makaron, ro PRO 6 hay nakalista it 66 nga indibidwal nga naaresto para sa pag-eabag sa nationwide gun ban.
Nakarekober man ro mga awtoridad it 66 nga firearms, tatlo nga gun replicas, ag ap-at nga explosives halin sa ginpatigayon nga mga operasyon.
