KALIBO, Aklan — Sa kritikal nga kondisyon ro sangka eaeaki matapos nga bun-on sa leog it nobyo it anang gumankon sa indi masayuran nga kabangdanan sa C. Laserna St., Brgy. Poblacion, Kalibo, pasado alas-11 it agahon it Martes, Disyembre 9.
Nakilaea ro biktima kay alyas Ernesto sa legal nga edad nga nag angkon it mga igo it pagbuno sa tuo nga leog ag iba pang parte it eawas nga insigidang gindaea sa Aklan Provincial Hospital.
Ro ginaturo nga suspek nga gina alegar nga menor de edad hay ro nobyo it anang gumankon nga parehong mga Senior High School student nga kon amat eamang nga naga-agto sa nasambit nga lugar.
Naaresto raya it mga pulis nga nagpatigayon it follow-up investigation.
Sa panaysayon it testigo nga si alyas Rubylyn, samtang nagatikang paagto sa tindahan gulpi eamang nga ginwahing it suspek ro biktima kadungan ro pagbuno sa anang leog ag iba pang parte it eawas.
Ginaboeobanta nga naga-abot sa ap-at ro igo it pagbuno it biktima.
Owa sigon it natabu nga anuman nga diskusyon ukon komosyon sa tunga it magtimbang nga parte.
Pilit nga nagpatunga ro anang nobya sa away, apang owa gid nagpamati ro suspek.
Maskin nga may igo eon it mga buno hay nakadaeagan pa sigon ro biktima ag nakapangayo it bulig sa mga residente, kun sa siin sangka driver it private tricycle ro nagpundo ag nagdaea kana sa ospital.
Padayun ro obserbasyon it mga doktor sa kondisyon it biktima.
