KALIBO, Aklan—Kasunod it pagnaba it numero it mga nailistang insidente it sunog ko buean it Marso it makaron nga dag-on kumpara ko 2024, mas pa nga ginpabaskog it Bureau of Fire Protection ukon BFP-Kalibo ro pagtau it mga tip sa paglikaw sa sunog.
Suno kay Fire Senior Inspector Macario Montaña Jr., fire marshall it BFP-Kalibo nga ro kasayuran ag tempranong pagdahan hay nagapabilin nga yabe sa paglikaw sa insidente it sunog.
Ro pagnaba sigon it numero it fire incident nga nag-abot sa daywa ko Marso nga puro minimal eamang ro danyos hay nagapakita nga naging epektibo ro andang kampanya sa pagtau it mga impormasyon, hugut nga pagpatuman it mga regulasyon sa kaeowasan ag aktibong partisipasyon it komunidad.
Bilang kaparte it padayun nga kampanya, uman nga ginpadumdum ni Montaña ro publiko nga obrahon nga simple apang importanteng tikang ro fire prevention eabi eon makaron nga tiempo it grabeng tag-init kun sa siin mataas ro peligro sa sunog.
Ginpamilit nana ro importansiya it pag-usisa sa mga koneksyon it kuryente, bangud nga ro mga samad ukon depektibong linya it kuryente ag pag overload it mga saksakan hay kaibahan gihapon sa mga nagapangunang rason it sunog.
Laygay pa nana nga siguraduhon nga mataas ro kalidad it mga kagamitang elektrikal nga ginagamit.
Mag-eowas kara, gina engganyo man it BFP ro publiko nga indi pag-aywan nga nakabukas ro kaeayo nga owa it bantay eabi eon sa pag-eaha ag pirmeng magpahaum it fire extinguisher ag mga baeas para sa emerhensiya.
Samtang, ro pag-angkon sigon it mga fire exits, fire alarms, ag sprinkler systems sa mga baeay, opisina ukon negosyo hay posibleng makaeowas it kabuhi.
Ko kan-o eamang hay nagpatigayon man sigon sanda it fire olympics kaibahan ro pilang mga barangay agud nga mas pa nga mapabaskog ro kasayuran it publiko ag ipakita ro kasanayan it mga bumbero sa pagsabat sa mga emerhensiya ag pagtapna it sunog.
Dugang pa kara nga magbilog ro kada pamilya it sangka fire escape plan, mag-install it smoke detectors, ag tur-an ro mga unga angot sa kaeowasan sa sunog.
Sa mga negosyo, kinahangean man suno kana ro pagsunod sa mga regulasyon it fire code ag regular nga magpatigayon it fire drills.
