KALIBO, Aklan—Maid-id ro monitorong nga ginahimo it mga barangay health emergency response teams ukon BHERTs sa mga nag-aeabutan nga Locally Stranded Individual ukon LSI’s ag Returning Overseas Filipinos ukon ROF’s.
Suno kay Ex Officio SB member Ronald Marte, ginatutukan it mga BHERTs ro nagapadayon sa andang 14 days quarantine period.
Aminado ro opisyal nga kat nagbukas ro border it Aklan kamana man kat nagbalik eon ro byahe it ro-ro vessel hay nagdueogsuan it pag-uli ro mga LSI’s kon sa siin ro iba sigon sa mga raya hay uwa eon nanda namonitor ro andang pag-abot bangud nga uwa man it koordinasyon sa lokal nga gobyerno it Kalibo.
Ginpahayag dugang ni Marte nga maskin ginkabig it national Inter Agency Task Force on Covid-19 ro probinsya it Aklan bilang low risk ag nagpabilin sa modified general community quarantine hay kinahang-ean gihapon naton ro hugot nga pagdahan bangud nga ro virus hay inde naton makit-an ag nagabantay eamang it anang mabiktima.
Nakapamayad suno kana ro temporaryong pagpapundo sa pagpauli sa mga LSI’s sa rehiyon bangud nga natutukan nanda ro mga naunang nag-eabutan partikular ro mga naka-home quarantine bangud nga punuan ro gintaeanang Local Covid Center ukon LCC it LGU.
