Kalibo Aklan ——Emosyunal nga nagdangop sa Bombo Radyo ro sangka 55-anyos nga biyuda matapos nga nagapameligro nga makakas sa listahan it Pantawid Pamilyang Pilipino Program (4P’s) it Department of Social Welfare and Development (DSWD) sa Brgy. Sigcay, Banga.
Suno kay Mrs. Teresita Navarra nga owa imaw nakabaton it masobra sa 5,000 pesos nga ayuda matapos nga gin-report imaw sa DSWD-Banga it anang mga unga nga naga-edad it 18 ag 15 anyos nga gina-alegar nga naglayas sa anang poder bangud sa pag-angkon nana it nobyo.
Pilit sigon nga ginabawi kana it DSWD Officer ro anang cash card , apang owa nana gintau .
Posible man suno kana nga ipaidaeum imaw sa assessment bangud sa alegasyon kontra kana nga owa nana ginatau ro hueay it anang mga unga.
Depensa pa it ginang nga owa man it klase rason nga gintago nana ro kwarta nga para kanda .
Aminado man si Mrs Navarra sa anang pakikipagrelasyon sa anang nobyo, apang owa man sigon kara nga interesan ro anang mga unga.
Owa sigon nana ginasakit ro anang mga unga, apang ginamueay bangud nga nagatuon-tuon eon nga magnobyo sa batang edad ag pirme nga nagawinarang .
Gusto man nana nga mag-uli eon ro anang mga unga ag magbalik sa anang poder.
Samtang, ginpaabot ni Mr. Lyndon Verano it Brgy. Polocate, Banga, maeayo nga igbata it tagreklamo nga kanda nagdayon ro daywang ka unga ni Mrs. Navarra bangud nga nagakabaeaka sigon ro mga raya sa andang kaeowasan bangud nga pirme nga naga-agto sa andang baeay ro anang gina-alegar nga karelasyon .
Ginpamalibaran man nana nga gina-brainwash nanda nga mag-asawa ro magmaeanghud .
