Nag-apela si Buruangga Mayor Conception Labindao nga mataw-an it hustisya nga kon ano ro nakasueat sa masterlist hay duyon sigon ro pagasundon.
Raya ro sambilog nga rason nga nagtueod kana para maghiwat it sangka press conference para masayuran it tanan nga taga-Buruangga nga raya hay indi ensakto.
Raya hay ginsakripisyohan it mga barangay officials sa paglista sa mga benipersyaryo nga makabaton it ayuda.
Nagpasaeamat man si Mayor Labindao sa mga nagbulig para matigayon raya mga maabot sa nasambit nga banwa ag mabaton it mga pumueuyo nga nabiktima it bagyong Ursula.
Suno man sa alkalde nga sambilog sa ginakahadlukan nana hay i-crush out ro pangaean kon owa nagboto sa mga kapitan nga nagasuporta kay Cong. Ted Haresco ag ro mga owa nailista hay anda nga listahon.
Ginpabutyag ni Mayor Labindao nga indi nanda kontra si Cong. Haresco.
Palangga nanda imaw rason nga nagdaog raya sa andang banwa.
Apang ana sigon ginpahayag suno sa alkalde nga kontra nana ro banwa it Buruangga.
Owa man sigon kasayod ro alkalde kung ham-an makaruyon ro anang pagtrato sa nasambit nga banwa.
Nasayuran nga umpisa nga naglaylo si Cong. Hareso kat owa it may nagsuporta sa ana nga proposed bill nga WASEZA ukon ro Western Aklan Economic Zone kon sa siin nagpanggayo raya it suporta sa tanan nga kabanwahanan sa Aklan.
Owa sigon it suporta halin sa mga alkalde ag pati ro banwa it Buruangga hay owa nagpasa it resolusyon ro Sangguniang Bayan sa nasambit nga proposed bill.
