KALIBO, Aklan—Ginkalipay it mga miyembro it Federation of Kalibo Tricycle Operators and Drivers Association Incorporation ukon FOKTODAI ro pronouncement nga una eon ro budget nga gintaeana it gobyerno probinsyal para kanda nga apektado it Covid-19 pandemic.
Suno kay FOKTODAI president Johnny Damian, pasaeamat sanda nga una eon ro pondo apang ginklaro kara nga kon sin-o eamang ro nakalista nga ginpasa sa provincial government hay posibleng sanda eamang ro mataw-an it 3,000 pesos nga bulig pinansyal.
Ginpaathag nga gintaw-an sigon it instruction it Provincial Social Welfare and Development Office (PSWDO) Aklan ro mga TODA president nga ilista ro andang miyembro nga uwa nakabaton it ayuda sa idaeom it Social Amelioration Program ukon SAP ag bukon it miyembro it 4P’s.
Sa banwa it Kalibo hay kapin sa 400 ka mga drivers ro naidentify nga kwalipikado sa nasambitang ayuda apang subject for validation ro nasambit nga listahan.
Gusto sigon kara nga ipaabot sa anang mga miyembro nga inde magsalig ro tanan nga mga drivers kaparehas sa nauna nga balita bangud bukon it tanan nga mga tricycle drivers hay makabaton it nasambit nga kantidad.
