KALIBO, Aklan—Kadungan it anang pagpanaog sa pwesto ag opisyal nga pagretiro sa pulitika, nagpaabot it pagpasaeamat si Former Aklan Governor Florencio Miraflores sa tanan nga nagtao kana it suporta sa sueod it pilang dag-on nga pagserbisyo.
Suno kana, maabo ro anang nahimo sa sueod it haeos 34 anyos nga pagserbisyo para sa progreso it probinsya.
Naging posible sigon ro pag-angat it Aklan bangud sa pagsalig nga gintao kana it mga pumueoyo.
Ginpasaeamatan man ni Miraflores ro anang mga naging kaibahan sa pulitika sa andang pagpartisipar para maging posible ro mga programa ag proyekto it gobyerno probinsyal.
Sambilog sa anang mga eubos nga ginapabugae hay ro pagbaton it pasidungog it probinsya partikular ro Seal of Local Good Goverance sa sueod it limang magkasunod nga dag-on umpisa 2015 hasta 2019.
Kung siin, ro Aklan eamang sa bilog nga Western Visayas ro nakabaton it nasambit nga pagpasidungog.
Makaron nga adlaw, pormal imaw nga pagabayluhan it anang unga nga si Joen Miraflores bilang bag-ong gobernador.
Nagapati sigon imaw sa kapasidad ni Governor Joen para sa mas pang pag-umwad it probinsya kamana man ro pag-eaum nga padayunon kara ro programa nga anang naumpisahan.
