KALIBO, Aklan—Ginainsister it grupong AnakBayan Panay nga kinahang-ean eon nga aprubahan ro ginaduso nga pagtaas it sweldo sa mga trabahador agud nga sandang mga pamatan-on hay makapangabuhi it disente.
Raya nga panawagan ni Mattew Gonzaga, regional spokesperson it Anakbayan Panay hay kasunod it andang ginpatigayon nga pagmartsa ko nagtaliwan nga Mayo 1 agud nga ipakita ro andang panawagan sa gobyerno nga taw-an it igataeopangod ro singgitan it mga trabahador sa nagkaeain-eain nga sektor.
Suno kana, agud nga makapangabuhi it maayos ag bastante sa pagkaon ro sangka pamilya hay kinahang-ean ro P1,200 pesos daily cost of living base man sa pagtantya it National Economic Development Authority ukon NEDA.
Nakikita sigon nanda nga bukon eon bastante ro presenteng daily minimum wage sa Western Visayas nga masobra sa P500 pesos bangud eon man sa kamahae it mga baeak-eon.
Kon may naga-eskwela pa suno kana nga mga inonga sa sangka pamilya hay kueang eon nga mayad ro kita it andang mga ginikanan rason nga sambilog sanda sa mga nagapanawagan nga insigidang tun-an ag inde pagpabaya-bayaan ro ginaduso nanda nga pagtaas it sweldo it mga trabahador.
