KALIBO, Aklan — Uman nga nagpanawagan ro kapulisan sa mga drivers it slow-moving vehicles nga pirmeng gamiton ro outer lanes agud nga mapahagan-hagan ukon eubusan nga matapna ro mga aksidente sa karsadahon.
Suno kay P/Major Willian Aguirre, deputy chief of police it Kalibo Municipal Police Station nga raya hay kasunod it nataeupangdan nga pag-inabu it mga motorsiklo, tricycle ag e-trikes sa mga national highways nga takaw aksidente.
Ko nagtaliwan nga domingo it Agosto suno kana hay nagpatigayon sanda it dry-run kun sa siin mas nanda nga ginhugtan ro monitoring ag pagsita kaibahan ro mga tawuhan it Kalibo Auxiliiary Police ag Transport and Traffic Management Division (TTMD)-Kalibo sa mga slow-moving vehicles nga naga-agi sa fast moving lane ukon sa tunga it highway.
Ginpaathag ni Major Aguirre nga sa ap-at nga lanes, ro 1 ag 4 hay gintaeana para sa slow-moving vehicles .
Ro mga saeakyan suno kana, mapa kotse, SUV , motorsiklo ukon tricycle nga mahinay ro pagpadaeagan ukon manaba sa 50 kph hay kinahangean nga gamiton sa tanan nga oras ro outer lanes.
Ginpadumdum man it opisyal ro memorandum circular it Department of the Interior and Local Government (DILG) nga hugut nga ginabawae ro pag-agi it mga tricycles, pedicabs, ag motorized pedicabs sa mga national highway.
Kaibahan man sa andang ginasita sa andang operasyon ro mga nagapatigayon it illegal parking sa national highway .
Dugang pa nga nagapadayun ro andang pag-edukar sa mga drivers agud nga masiguro ro andang kaeowasan kaibahan ro mga pedestrians .
Ro mga maga-eabag hay may multa nga P2,500. kaeabanan sigon nga violators hay mga private vehicles.
Padumdum pa ni Major Aguirre nga kon nagamaneho dapat nga ro mata hay pirmeng nakatutuk sa karsada ag magsunod sa traffic rules and regulations sa tanan nga oras agud nga makalikaw sa aksidente ukon owa pag-ilintindihan tuga it road rage.
