KALIBO, Aklan—Nagpahayag it pag-oponer si Kalibo Sangguniang Bayan member Augusto Tolentino sa pagbutang it protective barrier sa mga motorsiklo bilang requirement para makapag-angkas ro mag-asawa ukon couple.
Suno kay Tolentino nga owa it rason agud nga butangan pa it barrier ro tunga it mag-asawa nga magka-angkas sa motorsiklo bangud nga haeos bilog nga gabi-i nga magkaibahan sanda sa baeay.
Bastante eon suno kana ro pagsuksok it face mask ag helmet bilang proteksyon bangud nga may kaibahan man raya nga face shield bilang proteksyon kon naga andar eon ro motorsiklo.
Gindugang pa ni Tolentino nga kon pagabasehan ro design it igabutang nga barrier hay sab-eag pa raya sa rider eabi eon kon magapa-karga it gasolina bangud nga sa idaeum it pungkuan ro gas tank.
Nagapati man ro opisyal nga peligroso pa raya sa seguridad it naka-angkas eabi eon kon maeakot sa aksidente ro motorsiklo.
Posible man suno kana nga obrahon nga negosyo ro barrier bangud sa napabalita nga ginabaligya raya sa balor nga 600 hasta 1,000 pesos.
