KALIBO, Aklan—Mas pa nga pagapabaskugon it Bureau of Fire Protection ukon BFP-Kalibo ro andang kampanya kontra sa sunog sa makaron nga tiempo it paskwa ag bag-ong dag-on.
Suno kay Fire Senior Inspector Macario Montaña Jr., Municipal Fire Marshal it Kalibo nga raya hay sandig sa andang ginapatuman nga ‘Oplan Iwas Paputok’ ag ‘Oplan Paalala’ kada mag-abot ro holiday season.
Ginpahayag dugang nga pagaeauman nga mas pa nga pagapabaskugon ro presensiya it andang mga tawuhan sa nagkaeain-eain nga mga pampublikong lugar sa masunod nga mga inadlaw.
Ginpadumdum man ni Montaña ro publiko nga mas maging madahan samtang ginaselebrar ro paskwa ag bag-ong dag-on agud nga malikawan ro sunog.
Kaibahan sigon kara ro paglikaw sa paggamit it mga octopus connection, pagsiguro nga nakapaeos sa socket ro anumang appliances, indi pag-aywan ro mga gina-eaha, indi mag-pilak it upos it sigarilyo maskin siin eamang, indi magbutang it kandila maeapit sa mga Christmas tree ukon mga bagay nga madali nga maduktan it kaeayo, magbakae eamang it mga Christmas lights nga may ICC stickers ag Philippine standard marks ag iba pa.
Sa pihak nga parte sa selebrasyon it bag-ong dag-on, mas mayad suno kana nga magsunod sa patakaran nga magsindi eamang it mga paeupok sa mga gintaeana nga community fire works area kamana man nga mas mayad nga maggamit it torotot ag iba pang bagay nga makahimo it sangag.
Sa makaron hay nakataeana pa sigon sanda nga magapueong it LGU Kalibo agud nga maistoryahan kon siin igabutang ro baealigyaan it paeupok .
Hugut man nana nga ginapadumdum sa mga nagabakae it paeupok nga pili-on ro obra it mga lisensyadong nagahimo it paeupok ag likawan nga magbakae it mga illegal ag imported nga paeupok.
