KALIBO, Aklan–Gin-engganyo ni Punong barangay Daisy Andrade it Estancia, Kalibo ro mga pumueoyo nga maging responsable ag ipabilin ro kalimpyo sa andang palibot.
Raya hay kasunod it amat-amat nga pagtaas it kaso it dengue sa pagsueod it tyempo it tag-uean sa banwa it Kalibo.
Ginpaathag ni Kapitan Andrade nga kontrolado pa nanda ro sitwasyon ag owa pa haeos it nailistang dengue cases sa andang barangay.
Sa kamatuoran suno kana hay mas maabu ro tinamaan it COVID-19 kumpara sa nakaangkon it dengue virus.
Samtang, ginmanduan eon sigon ni kapitan ro mga barangay council nga magpatigayun it pagsikyar sa andang nasakupan para masiguro ro kaeuwasan it mga pumueoyo.
Kamana man nga nagpadaea eon imaw it request kay Kalibo Mayor Juris Bautista-Sucro para magpatigayun it fogging sa pilang ka mga Sitio sa andang barangay nga haeos dukot-dukot ro panimaeay.
