KALIBO, Aklan–Nagtukod ro lokal nga gobyermo it Kalibo it Bayanihan One Stop Shop para sa mga Locally Stranded Individuals nga gustong mag-apply para sa documentary requirements sa pagbiyahe pasueod ag paguwa it probinsiya it Aklan partikular sa banwa it Kalibo.
Suno kay Kalibo Mayor Emerson Lachica nga tuyo kara nga madasig nga ma-proseso it mga LSIs ro pagbo-oe it medical clearance certificate ag Travel Authority.
Raya sigon hay bilang sabat sa direktiba it Department of the Interior and Local Government ukon DILG.
Ro one-stop-shop hay ginaeakipan suno kana it PNP, DILG, MDRRMO, RHU ag iba pang staff it LGU-kalibo.
Sa idaeum it bag-ong proseso, kinahangean nga ro mga LSI hay magpa-rehistro anay sa ginhalinan nga barangay pinaagi sa gin-fil-apan nga registration form agud nga makapangayo it barangay certification nga owa imaw nakaangkon it anuman nga sintomas it COVID-19 it kapin sa daywang domingo antes ro anang pagbiyahe.
Kinahangean man nga magbo-oe it medical clearance certificate halin sa Rural Health Unit nga igasumite sa kalibo police station kaibahan ro registration form ag medical clearance certificate para sa iga-isyu nga travel authority.
Madumduman nga temporaryo anay nga ginsuspendi it daywang domingo it DILG ro pagpa-uli sa mga LSIs bangud sa nagatinaas nga kaso it covid 19 sa Negros Occidental ag Iloilo city.
