KALIBO, Aklan—Posibleng magapangatubang it administrative sanction depending on the gravity based on evidence ro limang pulis nga gina-alegar nga na-imbolbar sa hazing ag pagbakoe sa bagitong pulis matapos nga gin-assign raya sa Provincial Mobile Unit sa banwa it Buruanga.
Suno kay P/Maj. Willian Aguirre it Aklan Police Provincial Office (APPO) nga engkasong mapamatud-an ro ginhimo it mga nasambitan nga pulis sa biktima hay indi raya iga-tolerate it Philippine National Police (PNP).
Madumduman nga nauna eun nga ginpahayag it National Police Commission ukon Napolcom Region 6 nga gina-imbestigahan eun nanda ro hitabo.
Suno kay Atty. Joseph Celis, director it NAPOLCOM region VI nga personal nga nagdangop sa andang taeatapan si Patrolman Romel Magsusi agud nga ireklamo ro limang ka mga pulis.
Suno kay Atty. Celis, makabig nga pag-eabag sa anti-hazing law ro andang gin-obra nga pag-welcome sa andang kaparehong pulis maskin pa suno kana nga raya hay makabig nga tradisyon ukon common practice kon may nagasueod nga bag-ong miyembro sa andang unit.
Gindugang pa ni Atty. Celis nga ro limang pulis hay temporaryong ginsaylo sa Public Safety Company sa banwa it Libacao agud nga indi maimpluwensiyahan ro ginapatigayon nga imbestigasyon.
Ginahueat sigon nanda ro igasumite nga report ag kon may baeasihan, magpatigayon sanda it pre-charge investigation ukon preliminary examination kamana man evaluation it tagreklamo agud nga matumod kon may una nga probable cause.
