BANGA, Aklan—Sa pihak it pagbueoligan it gintingob nga pwersa it mga emergency responders it Municipal Disaster Risk Reduction Management Council sa bilog nga probinsya it Aklan, mga volunteers ag professional divers maghalin sa isla it Boracay ag iba pang lugar, nagapabilin nga napas-eawan ro mga raya nga makit-an ro eawas it naeomos nga si Jhuros Flores sa ika-limang adlaw it search and retrieval operation sa Aklan river nga sakop it banwa it Banga.
Maging ro alkalde it banwa it Kalibo hay nagpurchase it underwater drone agud nga makabulig sa pag-usoy sa eawas it 15-anyos nga binatilyo kon idto gidman raya sa idaeom it tubi ag inde makahalin apang napas-eawan gihapon sanda.
Mag-eowas kara, gindaea man it alkalde sa lugar maghalin sa Metro Manila ro kilaeang psychic sa nasyon nga si Jhay Costura kon sa siin ginbuksan pa kara ro third eye it tiya it biktima agud nga makit-an ro nakahamtangan it binatilyo.
Hasta sa nagtunod ro adlaw hay nagapabilin nga missing ro biktima.
Sakay sa rubber boat, gin-adtunan it alkalde kaibahan ko ginikanan it biktima kamana man si Costura ag ro tiya kara ro lugar nga ginatumod nga posibleng nakahamtangan it binatilyo apang nauli gihapon sa kapas-eawan.
Ro pagkaeomos it estudyante hay nagamarka eon makaron it kasaysayan sa probinsya matapos nga raya eamang ro unang kahigayunan nga haeos tanan nga MDRRMO’s sa Aklan, Philippine Coast Guard, PDRRMO ag mga professional divers, iba pang volunteer divers ag maging ro mga faith healer hay nagtingob pwersa sa pag-usoy sa eawas it biktima sa magkasunod nga limang adlaw.
Makaron nga Lunes ro ika-an-om nga adlaw it search and retrieval operation kon sa siin nagaeaum ro tanan nga makit-an eon ro eawas it biktima nga naeomos sa nasambit nga suba.
