KALIBO, Aklan — Ginkumpirma it Provincial Health Office ukon PHO Aklan nga owa pa napirmahan ro memorandum of agreement ukon MOA sa tunga it provincial government ag tatlong pribadong ospital para sa igatau nga medical assistance sa mga dengue patients nga indi eon masarangan nga i-akomodar sa provincial hospital .
Suno kay Dr Cornelio Cuatchon it PHO Aklan nga dapat nga may nagakaigo nga referral halin sa provincial hospital antes nga madaea ro pasyente sa mga private hospital nga dapat nga i-admit sa ward ag bukon it sa private room .
Ro nasambit nga tikang hay kasunod it maka-alarma nga pagtaas it kaso it dengue sa Aklan nga kaeabanan nga nagapabueong sa provincial hospital.
Nagpahayag eon sigon it interes nga makipagbueuligan sa provincial government ro St. Gabriel Memorial Medical Center, Panay Health Care ag Aklan Cooperative Mission Hospital .
Base sa kasugtanan, magataeana it pondo ro Department of Health nga iga-download sa gobyerno probinsiyal agud nga masabat ro pagpabueong sa mga pasyente.
Ginklaru pa kara nga ro excess sa PhilHealth coverage sa sakit nga dengue ro pagasabton it financial assistance it provincial government sa mga pribadong ospital .
Nasayuran nga kon amat hay nagaresulta sa “no balance billing” ro mga may sakit nga dengue sa idaeum it PhilHealth.
