Bukon eon it paeag kundi pagpang-abuso ro gina-obra makaron it China sa baybayon nga sakop it Pilipinas rason nga kinahangean eon nga maghimo it aksyon ro mga Filipino.
Suno kay Fr. Tudd Belandres , parish moderator it St. John The Baptist Cathedral nga dapat nga pasaeamatan si Lingayen- Dagupan Archbishop Socrates Villegas sa ginpaguwa nana nga pastoral letter agud nga mabugtaw ro tanan sa mga nagakatabu sa nasyon.
Nauna eon nga gintumod ni Villegas ro China bilang sangka paeag sa soberanya it Pilipinas bangud sa peligroso nga paghana nga angkunon ro baybayon nga ginapanag-iyahan it Pilipinas.
Nagakabaeaka man si Fr. Tudd bangud sa tiempo makaron kun sa siin kinahangean suno kana nga maghugpong ro tanan hay natunga pa ro mga lideres it nasyon kapareho nanday Pangueong Ferdinand Marcos Jr., ag Vice President Sara Duterte-Carpio bangud sa andang mga pansariling interes.
Bangud sa korapsyon, bukon man sigon it maeayo ro ginmitlang it Arsobispo nga may posibilidad nga ro gobyerno hay nasueod eon it Chinese assets nga natalakay sa mga pag-usisa it Kamara ag Senado.
Mag-eowas sa pagpatigayon it rosary campaign kontra sa agresyon it China nga paga-umpisahan sa Hunyo 27 hasta Agosto 15, nagpanawagan man si Villegas sa mga Katoliko nga magpu-asa kon pwede man lang kamana man nga mag-penitensya sa sueod it raya nga mga paniempo.
